Baladweyne ( Radio Beerlula )-Kooxda Barcelona ayaa lagu soo waramayaa in ay isha ku hayso xiddiga garabka uga ciyaara kooxda Man United ee Jadon Sancho ka hor inta uuna amaah ugu dhaqaaqin.
Wararka ayaa sheegaya rabitaanka ah in Barca amaah ugu dhaqaaqdo Sancho aysan macquul ahayn , maadaama ay United dalban doonto in Barcelona ay bixiso dhammaan mushaarka 24-jirka ah ee xilli ciyaareedka.
Sancho ayaa lagu soo waramayaa in uu sanadkii qaato ku dhawaad 15 milyan oo ginni, taasoo ka dhigi doonta mid aan macquul aheyn marka loo eego dhibaatooyinka dhaqaale ee Barcelona.
Kooxda Hansi Flick ayaan haatan awoodin in ay diwaan galiyaan saxiixa cusub ee Dani Olmo ka dib markii uu kaga soo biiray RB Leipzig.
Sancho ayaa ku soo laabtay United ka dib markii uu qeybtii labaad ee xilli ciyaareedkii hore amaah ku qaatay Borussia Dortmund.
Inkasta oo ay hore isku dheceen tababaraha United Erik ten Hag, Sancho waxa uu ka soo muuqday kulamadii isku diyaarinta xilli ciyaareedka.
Sancho ayaa kasoo muuqday kulankii Community Shield isagoo badal kusoo galay balse rigoore ayuu qasaariyay kulankii ay guuldarada kala kulmeen Manchester City.
Si kastaba ha ahaatee, isagu kuma lug lahayn kulankii furitaanka Premier League-ga ee Fulham.