Baledweyne ( Radio Beerlula )-Marcus Rashford ayaa markii saddexaad laga saaray shaxda Ruben Amorim Axadii iyadoo Man United ay guuldarro 3-0 ah ka soo gaartay Bournemouth.
27-sano jirkaan ayaa sidoo kale laga saaray guushii derby ee Manchester City horaantii bishaan iyo guuldaradii khamiistii ee Carabao Cup kasoo gaartay Tottenham.
Labo maalmood ka hor kulankii Tottenham, Rashford ayaa wareysi uu bixiyay ku sheegay inuu diyaar u yahay tartan cusub taasoo la micno ah inuu soo gabagabeyn doono mustaqbalkiisii Red Devils.
Weeraryahanka reer England oo lala xiriirinayay Paris Saint-Germain, waxaa hadda soo baxday in Barcelona ay dooneyso in ay Man Utd la gasho heshiis isdhaafsi ah oo Rashford iyo Fati labada dhinac ugu kala wareegayaan, sida TEAM Talk ku warameyso.
Ninka Ingariiska ah ee Rashford ayaa u dhaqaaqi doona Catalunya, iyadoo Ansu Fati uu dhanka kale Man United maaliyadeeda xiran doono.
Wararka ka imaanaya Spain ayaa sheegaya in macalinka Barca Hansi Flick uu ku wargaliyay madaxda kooxdiisa in loo keeno xiddiga Man United ku dhawaaqay inuu ka tagayo ee Rashford.
Heshiiska ayaa u fiican dhanka Man United oo la fahamsan yahay in ay ka walwal qabto in ciyaaryahanka uu u dhaqaaqo koox ay ku xafiiltamaan Premier League.
Talaabadan ayaa sidoo kale wax weyn u noqon karta Ansu Fati oo heli kara fursad uu dib ugu soo celiyo qaab ciyaareedkiisii ugu fiicnaa.