Baledweyne ( Radio Beerlula )-Tababaraha Chelsea, Enzo Maresca ayaa amaanay weeraryahanka Ipswich Town Liam Delap ka hor kulanka labada kooxood Premier League ku kulmayaan Isniinta Portman Road.
Chelsea ayaa todobaadyadii la soo dhaafay lala xiriirinayay weeraryahanka aadka loo qiimeeyo ee wacdaraha dhigaya xili ciyaareedkaan Premier League ee Delap.
Delap waxa uu la soo shaqeeyay tababare Maresca intii ay wada joogeen kooxda Manchester City ciyaartooyda U-23.
Maresca oo ka hadlayay ka hor kulanka ay Chelsea la ciyaari doonto Ipswich Town, wuxuu ku tilmaamay 21 jirkan ciyaartoy cajiib ah, isaga oo ku amaanay awooda uu ku dhaliyay 24 gool hal xilli ciyaareed.
“Liam waa ciyaaryahan cajiib ah, waxaan isla joognay hal sano. Waxaan u maleynayaa inuu dhaliyay 22 ama 24 gool,” Maresca ayaa yiri.
“Kani waa weeraryahan aad u wanaagsan, si adag ayuu uga shaqeeyaa xerada ganaaxa, wuu fahmayaa ciyaarta, goolalna wuu dhalin karaa.
Da’diisa, waxaan u maleynayaa inuu noqon karo ciyaaryahan muhiim u noqda xulka England mustaqbalka” ayuu yiri macalinka Chelsea.