Baladweyne ( Radio Beerlula )-Arsenal ayaa taariikh cusub ka sameysay Champions League kadib markii ay 7-1 ku xasuuqeen PSV Eindhoven kulankii lugta hore ee wareega 16-ka oo ka dhacay Netherlands talaadadii.
Guushaan ayaa noqotay midii ugu weyneyd ee abid laga gaaro kulan marti ah oo ka tirsan wareegyada bug-baxa Champions League, sidoo kalena waa guushii ugu weyneyd ee Arsenal ay ka gaarto kulan Champions League oo ay marti yihiin.
Jurrien Timber ayaa furay goolasha daqiiqadii 18-aad, waxaana raaciyay da’yarka Ethan Nwaneri ka hor inta uusan Mikel Merino dhalinin goolka seddexaad daqiiqadii 31-aad.
Kooxda horyaalka Netherlands ee PSV ayaa gool iska soo celisay markii Noa Lang uu rikoodhe dhaliyay, taasoo ka dhigtay ciyaarta 3-1 qeybtii nasashada, balse laba gool oo degdeg ah oo ay Arsenal ka dhalisay seddexda daqiiqo ee ugu horeysay qeybta labaad ayaa muujisay sida ay u awood badan yihiin, iyadoo kabtanka Martin Ødegaard iyo Leandro Trossard ay shabaqa soo taabteen.
Ødegaard ayaa goolkiisa labaad dhaliyay daqiiqadii 73-aad ka hor inta uusan bedelka soo galay ee Riccardo Calafiori dhalinin goolka todobaad shan daqiiqo ka hor dhamaadka si uu u dhamaystiro xasuuqa, taasoo Arsenal ka dhigtay kooxdii ugu horeysay ee toddobo gool ku dhalisa kulan bug-bax Champions League ah oo ay marti yihiin.
Arsenal ayaa ciyaarta ku bilaabatay dardar xoogan, inkastoo kooxda martida loo ahaa ee PSV ay fursad weyn heshay daqiiqadii 16-aad markii kubbad uu soo dhigay Ivan Perisic uu goolhaye David Raya iska bixiyay taasoo u tagtay Ismael Saibari oo birta ku garaacay isagoo meel dhow ka toogtay.
Laba daqiiqo kadib, kubbad uu soo wareejiyay khadka dhexe ee Arsenal Declan Rice ayaa keentay goolka furitaanka markii uu Timber madax ku dhaliyay isagoo ka sare maray Noa Lang oo isagu ku jiray qeybta dambe ee daafaca.
Dhinaca bidix ee weerarka Arsenal ayaa sidoo kale keenay goolka labaad markii uu Myles Lewis-Skelly soo dhigay kubbad dhinac ah taasoo uu Nwaneri si fudud ugu dhaliyay meel dhow.
Lewis-Skelly ayaa nasiib lahaa inuu ka badbaado casaan kadib markii uu qalad xun galay oo ka careysiiyay ciyaartoyda iyo shaqaalaha PSV.
Goolka uu dhaliyay Merino wuxuu yimid kadib dadaal uu sameeyay Timber oo isku dayay inuu ku dhex ordo xerada ganaaxa PSV. Kooxda martida loo ahaa ayaa isku dayday inay joojiso, balse markii kubbadda ay banaanka u soo baxday, daafaca Ryan Flamingo ayaa ku guuldareystay inuu si sax ah u bixiyo taasoo fursad siisay Merino oo kubadda ku hubsaday geeska fog ee shabaqa.