Baledweyne ( Radio Beerlula )-Xaaladda Andre Onana ee Manchester United ayaa cirka isku sii shareertay kaddib markii khaladaadkiisii ugu dambeeyay ay sababeen in kooxdu barbaro 2-2 ah la gasho Lyon lugtii hore ee wareega 8da Europa League. Goolhayaha reer Cameroon ayaa lagu eedeeyay inuu mas’uul ka ahaa labadii gool ee Lyon ay dhaliyeen, midkii horreeyay iyo midkii barbaraha ahaa ee daqiiqadihii dambe yimid.
Onana ayaa si xun u maareeyay goolkii Thiago Almada daqiiqadihii hore, taasoo sababtay inuu si khaldan u celiyo kubadda oo ay gudaha shabaqa gasho. Waxaana intaas u sii dheer, daqiiqadihii dheeriga ahaa ee ciyaarta, goolhayaha ayaa si liidata u qabtay laad uu dhaliyay Georges Mikautadze, taasoo Rayan Cherki uu ka faa’iidaystay si uu ciyaarta uga dhigo 2-2.
Khaladaadka Onana waxay si gaar ah u muuqdeen xilli uu dood kulul la galay laacibkii hore ee Man United, Nemanja Matic, kaasoo ugu yeeray “mid ka mid ah goolhayeyaasha ugu liita taariikhda Man United,” kaddib hadal uu Onana ku sheegay in kooxdiisa ay “si weyn uga fiican tahay” kooxaha kale ee Europa League.