Baledweyne ( Radio Beerlula )-Kooxda Arsenal ayaa wadahadallo rasmi ah la billowday Chelsea si ay ula soo saxiixato garabka weerarka ee reer England Noni Madueke, sida ay xaqiijinayaan warbixinno ka imaanaya The Athletic iyo ilo kale oo dhowr ah.
Madueke, oo 23 jir ah, ayaa la fahamsan yahay inuu mudnaan gaar ah siiyay ku biirista Arsenal, iyadoo xitaa la sheegay in labada dhinac – ciyaaryahanka iyo Gunners – ay horey uga heshiiyeen shuruudaha shaqsiyadeed ee qandaraas shan sano ah.
Xilli ciyaareedkii hore, Madueke wuxuu Chelsea u saftay 46 kulan, isagoo ku lug yeeshay 16 gool (11 gool iyo 5 caawin), inkastoo uu laba jeer ka maqnaa kooxdii ciyaarihii Premier League sababo la xiriira “go’aanno farsamo” oo uu sheegay tababaraha cusub Enzo Maresca.
Wadahadalladan ayaa imaanaya kaddib markii Arsenal ay sidoo kale la wareegtay goolhayihii hore ee Chelsea, Kepa Arrizabalaga, iyagoo dhaqaajiyay qodobka heshiiskiisa.
Si kastaba ha ahaatee, labada kooxood ayaa la rumeysan yahay inay wali ku kala aragti duwan yihiin qiimaha ciyaaryahanka, iyadoo Chelsea ay sanadkii 2023 kula soo wareegtay Madueke qiimo dhan £28.5 milyan.
Wixii ka dambeeya horumarka wadahadallada, taageerayaasha Arsenal ayaa rajeynaya in Madueke uu noqdo xiddig muhiim ah oo xoojiya garbaha weerarka ee kooxda Mikel Arteta.