Baladweyne ( Radio Beerlula ) – Cabsidii ugu weyneyd ee Barcelona ay qabtay ayaa xaqiiq noqotay iyadoo Ousmane Dembele uu garoomada ka maqnaan doono muddo shan isbuuc ah ka dib dhaawacii soo gaaray kulankii Girona ee Sabtidii.
Xiddiga Faransiiska ayaa la bixiyay daqiiqadii 25aad ka dib dhaawac soo gaaray.Baaritaanadii ugu horeeyay ayaa muujiyay in dhaawaca uu ahaa muruqa lugta iyadoo wararku ay sheegayeen inuu maqnaanayo seddex isbuuc laakiin dhaawaciisa wuu ka xumaaday sidii la maleynayay.Waxaa la sheegay in jeex uu ka galay muruqa taasoo keeneysa in shan isbuuc uu garoomada ka maqnaado.
Waxay tani ka dhigan tahay in Ousmane Dembele uu seegayo ilaa iyo sagaal kulan oo muhiim u ah kooxda Barcelona.
Wuxuu seegayaa labada kulan ee ay la ciyaarayaan Manchester United ee Europa League.
Wuxuu sidoo kale maqnaanayaa kulamada horyaalka La Liga ee ay la ciyaarayaan Real Betis, Sevilla, Villarreal, Cadiz, Almeria iyo Valencia.
Waxaa intaas u sii dheer inuu seegi doono kulanka semi-finalka Copa del Rey.
Warkaan wuxuu niyadjab weyn ku yahay tababare Xavi Hernandez madaama Dembele uu xilli ciyaareedkan wacdarro u dhigayay kooxda reer Catalan.