Baladweyne(Radio Beerlula)-Micah Richards ayaa aaminsan in Manchester United aysan ku guuleysan karin horyaalka Premier League sababtoo ah Wout Weghorst ma dhalin doono goolal ku filan.
Kadib barbarihii lama filaanka ahaa ee ay Arsenal la gashay Brentford, labada kooxood ee Manchester ayaa guul gaadhay waxana ay ka kala badiyeen kooxaha Aston Villa iyo Leeds United.
Guusha Red Devils ayaa la macno ah in ay 5 Dhibcood ka dambayso hogaamiyayaasha horyaalka ee Arsenal inkasta oo ay hal kulan oo dheeraad ah ciyaareen.
Richards oo Man City u soo ciyaaray ayaa aaminsan in ayna Man United wax fursad ah u haysan horyaalka premier League sababta oo ah maadama ayna haysan weeraryahan heer sare ah.
Isaga oo la hadlaya Sky Sport ayuu yidhi”Dhibaatada kaliya ee aan haatan arkayo ayaa ah in ayna Man United haysan No.9 fiican”.
“Wout Weghorst waa ciyaaryahan wanaagsan, si fiican ayuu isku xiraa weerarka iyo khadka dhexe laakiin ma dhalin karo goolal ku fican oo uu uga caawin karo kooxda si ay ugu tartanto horyaalka”.
“Marcus Rashford waxa uu qaadanayaa xilli ciyaareed fiican laakiin ma sii wadi karaa qaab ciyaaredka ilaa dhamaadka xilli ciyaareedkan”.
“Arsenal waxa ay heshay Gabriel Jesus oo soo laabtay, Man City waxa ay haysataa [Erling] Haaland iyo ku guulaystihii koobka adduunka ee Julian Alvarez oo kaydka fadhiya”ayuu sii raaciyay.