Baladweyne (Radio Beerlula)- Maamulka kooxda Chelsea ayaa ugu dambayn xalay gaadhay go’aanka ay tababarihii labaad kaliya gudaha xilli ciyaareedkan shaqada kaga caydhinayaan iyagoo diray Graham Potter.
Sida wargeyska Sportsmail uu daboolka ka qaaday Salaasadii hore, tababarihii hore ee Bayern Munich ee Julian Nagelsmann ayaa kamida tababarayaasha u tartamaya shaqada Chelsea.
Maamulka Chelsea ayaa mudo toddobaadyo ah ka fikirayay mustaqbalka Graham Potter kaddib xilli ciyaareed liita oo ay kooxdu dhexda ka gashay.
Haatan saxafiga weyn ee Fabrizio Romano ayaa daboolka ka qaaday kaddib caydhintii Potter in Nagelsmann yahay macalinka ugu cad cad shaqada ka banaanaatay Stamford Bridge.
Sidoo kale Mauricio Pochettino oo doorkaas u tartamayay markii Thomas Tuchel la caydhiyay bishii September ayaa wali la heli karaa balse ma jiro wax xidhiidh ah oo ay kooxda ree London la samaysay.