Baladweyne ( Radio Beerlula )-Tababaraha Manchester City ee Pep Guardiola ayaa farriin muhiim ah usii diray taageerayaasha kooxdiisa kahor kulanka Arsenal ay la ballansan yihiin habeen dambe.
Labada kooxood ee xilli ciyaareedka badi kusoo tartamayay horyaalka ayaa habeen dambe ku kulmaya Etihad Stadium, Arsenal ayaa haatan shan dhibcood ku haysa hoggaanka walow ay laba kulan dheer tahay City.
Kooxda habeen dambe saddexda dhibcood wada qaadata ayaa loo arkaa inay u dhawdahay ku guuleysiga horyaalka. Arsenal ayaa saddexdii kulan ee ugu dambeeyay saddex barbardhac soo gashay iyagoo fursad dahabi ah siiyay City.
Guardiola ayaa kahor kulankaas taageerayaasha kooxdiisa u sheegay inay ciyaarayaan Final isla markaana u baahan yihiin inay garab istaagaan oo garoonka soo buuxiyaan kulanka kahor.
“Arbacada waa Final aan la leenahay koox ahayd mida ugu wanaagsan England ilaa haatan oo shan dhibcoodna inaga horreysa” ayuu yidhi Pep.
“Waan ogahay walow ay barbaro galeen saddexdii kulan ee ugu dambeeyay haddana qaabka ay u ciyaaraan qaybo waaweyn oo kulanka kamid ah way adagtahay in la joojiyo. Kulan weyn oo muhiim ah ayuu noo yahay anaga, waanu ognahay in guushu ay nasiin doonto talaabo aanu gabi ahaanba gacanatayada ku qabsan doono wixii dhacaya intaas kaddib”.
“Premier League waa 11 bilood oo shaqo, shaqo iyo shaqo ah waxaananu doonaynaa inaanu fursadan qaadano. Kaligayo ma samayn karno, waxaan ku rajo weynahay in Ettihad oo dhammi buuxi doono saddex saacadood kahor kulanka”.