Baladweyne ( Radio Beerlula )-Kooxaha reer Spain ee Real Madrid iyo Barcelona aya waxay ku dagaallamayaan saxeexa ciyaartoy da’yar oo qiime hooseeya lagu jabin karayo qandaraaskiisa, kaas oo uu Xavi Hernandez doonayo inuu usoo xero-geliyo qaabkii Pablo Torre oo kale oo xagaagii ay ka xoogeen Los Blancos.
Sida uu kusoo warramayo wariyaha ciyaaraha ee Oscar Mandez, labada kooxood ee ugu waaweyn Spain ee Real Madrid iyo Barcelona ayaa waxay mid walba dhinaceeda u doonaysaa Hugo Sotelo oo ah da’yar u dhashay waddanka Spain oo ka tirsan kooxda Celta Vigo.
Hugo Sotelo oo 19 jir ah ayaa waxa uu kasoo dallacay kulliyadda da’yarta Celta Vigo oouu ku biiray isaga oo siddeed jir ah, haddana waxa uu ka mid yahay laacibiinta khadka dhexe ee ugu fiican ee usoo baxaysa Spain isaga oo wacdaro ka dhigaya horyaalka LaLiga.
Sannadkii 2021 ayaa isaga oo ay da’diisu ahayd 17 jir waxa uu usoo dallacay kooxda koowaad ee Celta Vigo, waxaase uu saluug badan ka qabaa fursadda ay kooxdiisu siinayso, inkasta oo uu 22 ciyaarood u saftay oo uu u dhaliyey hal gool, laba kalena caawiye ka noqday.
Hugo Sotelo oo ku wanaagsan kubbadda, toogashada masaafada fog, iyo dhamaystirkiisa oo fiican ayaa waxa qandaraaskiisa Celta Vigo lagu burburin karayaa €10 milyan oo Euro, laakiin kooxdiisa ayaa doonaysa inay ka saxeexdo heshiis cusub oo lagu darayo qodob sare u qaadaya lacagta xakamaha looga dhigayo naadiyada kale oo la gaadhsiin doono illaa €20 milyan oo Euro.