Baladweyne (Radio Beerlula)-Real Madrid iyo Barcelona ayaa ku dhawaaqay kulan ka hor xilli ciyaareedka cusub oo 28-ka July ka dhici doona garoonka Dallas Cowboys’ AT&T Stadium – sanad ka dib markii ay isaga horyimaadeen Las Vegas.
Kooxda reer Spain ayaa xagaagii hore ku kulmay garoonka Allegiant oo ay ka soo qeyb galeen dad gaaraya 63,000 teegeere sidoo kale aageerayaasha Texas ayaa haatan fursad u heli doona inay daawadaan Vinicius Jr., Robert Lewandowski iyo xiddigaha kale ee labada kooxood.
Ka hor inta aysan la kulmin Madrid, Barcelona waxay wajihi doontaa Juventus iyo Arsenal oo ay ku wada ciyaari doonaan gobolada kale ee dalka.
Juve ayaa la ciyaari doonta Barca 22 July kulan ka dhici doona garoonka San Francisco’s Levi’s Stadium, halka kooxda Catalan ay afar maalmood ka dib Gunners kula ciyaari doonto Los Angeles garoonka SoFi Stadium.
Dhanka kale, Madrid ayaa ku dhawaaqday inay la ciyaari doonto kooxaha Ac Milan, Man United iyo Juventus kulamo ka dhici doona gobolada kale ee dalka Maraykanka.
Kulanka ay la ciyaari doonaan Ac Milan ayaa dhici doona 23 bisha Kulay kaas oo ka dhici doona garoonka Rose Bowl halka ay United kula ciyaari doonaan NRG Stadium ee Houston July 26.
Kulanka ugu dambeeya ee safarkooda ayaa noqon doona kulanka ay la ciyaari doonaan Juventus kulan ka dhici doona garoonka Camping World Stadium 2 bisha August.