Baladweyne (Radio Beerlula)-Kooxda Arsenal ayaa weli si xooggan uga shaqeyneysa sidii ay u heli lahayd weeraryahan cusub, iyadoo labada xiddig ee Benjamin Sesko (RB Leipzig) iyo Viktor Gyokeres (Sporting CP) ay yihiin bartilmaameedkooda ugu weyn – labadaba waxaa lagu qiimeeyaa ku dhowaad €70 milyan.
Sida uu sheegay wariyaha caan ka ah Ben Jacobs, agaasimaha ciyaaraha ee Arsenal Andrea Berta ayaa si xeeladaysan u maareynaya wada-hadallada, isagoo isticmaalaya xiisaha labada ciyaaryahan si uu Arsenal ugu helo heshiis dhaqaale oo macquul ah.
Jacobs ayaa yiri:
“Sesko iyo Gyokeres — yaa og, waxaa suurtagal ah in Ollie Watkins (Aston Villa) sidoo kale uu noqdo dookh kale. Arsenal waxay rabtaa hal arrin: in ay midkood ku hesho €70m.”
“Berta wuxuu leeyahay: ‘Haddii aan helin Gyokeres, waxaan aadeynaa Sesko. Haddii aan Sesko helin, waxaan aadeynaa Gyokeres.’ Waan hubaa in Leipzig iyo Sporting aysan midna si dhab ah u ogayn halka Arsenal dhab ahaantii u socoto.”
Jacobs ayaa sidoo kale xusay in haddii labadaas qorshe ay burburaan, Ollie Watkins uu noqon karo dookh kale. Si kastaba, Aston Villa ayaa la filayaa inay si adag u difaacdo weeraryahankooda, maadaama ay haatan iibisay kooxdii dumarka si ay ula jaanqaaddo xeerarka dhaqaale (PSR), taasoo la micno ah inay dalban karaan £60m ama ka badan.
Arsenal ayaa haatan u muuqata mid heegan u ah inay qarash badan ku bixiso suuqa si ay u xoojiso weerarka kahor bilaabashada xilli ciyaareedka cusub.