Baladweyne (Radio Beerlula)-Robert Lewandowski ayaa hoggaaminaya bilowga cajiibka ah ee Barcelona xilli ciyaareedka 2024/25 iyadoo uu maamulayo tababare Hansi Flick.
Weeraryahanka khibradda leh ee reer Poland ayaa horey loola xiriiriyay inuu ka tagi doono kooxda Catalonia ka hor imaanshiyaha Flick, balse labadoodu waxay dib u soo celiyeen qaab ciyaareedkii wacnaa ee ay ku heysteen Bayern Munich.
Lewandowski ayaa durbaba dhaliyay tiro cajiib ah oo ah 19 gool tartamada oo dhan, isagoo saftay kaliya 16 kulan.
Inkasta oo uu bishii Agoosto gaaray da’da 36, haddana Lewandowski wuxuu weli u muuqdaa mid firfircoon, isagoo ah xiddigga ugu muhiimsan weerarka Flick.
Hadafkiisu waa inuu mar kale gaaro 20 gool iyo ka badan horyaalka, waxaana uu ku socdaa waddadii uu ku garaaci lahaa tiradii goolasha ee uu u dhaliyay Barcelona xilli ciyaareedkiisii ugu horreeyay ee 2022/23 oo uu gaaray 33 gool.
Sida laga soo xigtay wararka ka imanaya Diario Sport, Barcelona ayaa diyaar u ah inay burburiso qodob heshiiskiisa ku jira si loo kordhiyo qandaraaskiisa 12 bilood oo dheeraad, haddii uu safto boqolkiiba 55% kulamada soo aaddan xilli ciyaareedkan.
Faahfaahinta heshiiskaas ayaa tilmaamaya in mushaarkiisa €32m sanadkii la dhimayo oo laga dhigayo €26m sanadka 2025/26.
Iyadoo shuruuddaas la filayo inay noqoto mid fudud bilaha soo socda, Barcelona waxay diyaar u tahay inay sii dheereyso qandaraaskiisa ilaa 2027, iyadoo la sameynayo mushaar dhimis.