Baladweyne ( Radio Beerlula)-Kooxda FC Barcelona ayaa wada-hadallo la billowday wakiillada weeraryahanka Chelsea ee Nicolas Jackson, taasoo muujinaysa suurtogalnimada uu ugu wareegi karo kooxda reer Spain. Sida uu qoray wargeyska reer Senegal ee Taggat, kooxda reer Catalonia ayaa toddobaadkan billowday wada-xaajoodyo ay la yeelanayaan dhinaca ciyaaryahanka, waxaana la sheegayaa in Jackson uu diyaar u yahay inuu u dhaqaaqo Camp Nou.
Jackson ayaa ku biiray Chelsea bishii Juun 2023 isagoo saxiixay heshiis sideed sano ah oo lagu sheegay inuu qiimihiisu yahay £32 milyan.
Inkasta oo uu dhawaan dhaawac muruqa bowdada ah ku seegay labo bilood, haddana waxa uu xilli ciyaareedkan 2024–25 dhaliyay 13 gool iyo 5 caawin. Waxqabadkiisa ayaa soo jiitay indhaha kooxo dhowr ah.
Iyadoo suuqa kala iibsigu sii furnaanayo, waxaa la filayaa in wada-hadallada u dhexeeya Barcelona iyo Chelsea ay sii socdaan si loo qiimeeyo suuragalnimada Jackson uu ugu biirayo Barcelona.