Baladweyne (Radio Beerlula)-Kooxda kubadda cagta Bayern Munich ayaa diyaarinaysa dalabkii saddexaad oo ay ka gudbinayso weeraryahanka Tottenham ee Harry Kane, kddib markii ay guuleysan waayeeln laba jeer oo hore oo ay dalabyo ka gudbisay laacibkan balse ay Tottenham hoos iskaga dhigtay.
Harry Kane oo heshiiskiisa Tottenham ay 12 bilood oo kali ahi ka hadhsan yihiin ayaa maanta dib ugu laabtay xarunta kooxdiisa oo uu kala hadlayo mustaqbalkiisa, waxaana la rumaysan yahay inuu ku riixayo inay iibiyaan, halka kooxduna ku dedaalayso inay ogolaysiiso inuu saxeexo heshiis cusub.
14 sannadood oo uu Harry Kane u ciyaarayay Tottenham oo aanu wax koob ah kula guuleysanin, ayaa la sheegay in ay ku qasbayso inuu iskaga tago si aanu xirfaddiisa kubdda cagta usoo gabogabaynin isaga oo koob la’aan ah.
Bayern Munich oo iibinaysa toddoba ciyaartoy oo kooxdeeda ah ayaa la sheegay in ay lacagta ay ka hesho u isticmaali doonto Harry Kane oo dalabka ay hadda diyaarinayso uu xambaarsan yahay €80 milyan oo Euro, waxaana uu noqon doonaa ciyaartoygii ugu qaalisanaa taariikhda Bayern Munich.
Si kastaba ha ahaatee, Bayern Munich ayaa waxa kale oo ay indhaha ku haysaa Dusan Vlahovic iyo Rasmus Hojlund oo ay u aragto dookh wanaagsan oo ay tahay inay la saxeexdaan haddii ay waayaan Harry Kane.