Baladweyne ( Radio Beerlula )-Sida uu sheegay wariyaha caanka ah Gerard Romero, tababaraha Barcelona Hansi Flick ayaa si xooggan u dalbanaya in kooxdu lasoo saxiixato daafac dhexe maalmaha yar ee ka harsan suuqa kala iibsiga xagaaga.
Baahidan ayaa timid kaddib markii Iñigo Martínez uu ku biiray Al-Nassr, taasoo Barcelona ka dhigtay kuwo ku liita dhanka difaaca dhexe. Xilli ciyaareedka cusub ee 2025–26, Barca waxa ay ka qayb galeysaa tartamada La Liga, Champions League iyo Copa del Rey, taas oo ku qasbeysa in ay yeeshaan qoto dheeri difaac.
Flick, oo kooxda ku hogaamiyey seddexleydii maxalliga ee xilli ciyaareedkii hore, ayaa welwel ka qaba dhaawacyada soo noqnoqda ee Ronald Araújo, Andreas Christensen iyo Eric García, iyadoo kaliya Pau Cubarsí uu si joogto ah ugu muujiyay kalsooni. Tababaruhu xitaa waxa uu ku khasbanaaday inuu Gerard Martin, oo ah daafac bidix, ka ciyaarsiiyo daafaca dhexe intii lagu jiray xilli-ciyaareedkii hore.
Isagoo la shaqeynaya agaasimaha ciyaaraha Deco, Flick waxa uu doonayaa daafac khibrad leh oo si fudud ula qabsan kara qaab ciyaareedka kooxda. Si kastaba ha ahaatee, xaaladda dhaqaale ee Barcelona ayaa caqabad ku noqon karta, inkasta oo ay hore u sameeyeen saxiixyo ay ka mid yihiin Joan Garcia iyo Marcus Rashford.
Flick ayaa rumeysan in daafac dhexe oo cusub uu muhiim u yahay horumarka Barca, gaar ahaan iyadoo kooxda ay qorsheyneyso inay dib ugu soo laabato Camp Nou.