Baladweyne ( Radio Beerlula )-Saxeexa cusub ee kooxda Inter Miami ee Lionel Messi ayaa durba saamayntiisa muujiyay isagoo saddex dhibcood oo dahabi ah kooxdiisa u keenay kulankiisii koowaad.
Tababare Tata Martino ayaa keydka kusoo bilaabay Lionel Messi iyo Sergio Busquets labadaba maadaama oo aysan kulan dhammaystiran taam buuxa u ahayn oo dhawaan uun tababarka bilaabeen.
Kulankan oo ay la lahaayeen CD Cruz Azul ayuu daqiiqadii 44-aad Miami hoggaanka u dhiibay Robert Taylor kahor inta uusan kooxda martida ahayd goolka usoo celin Uriel Antuna daqiiqadii 64-aad.
Ugu dambayn daqiiqadii 94-aad ayaa laad xor ah loo dhigay Inter Miami waxaana dul istaagay Lionel Messi oo gool cajiib ah ku shubay shabaqa Cruz Azul sidaasna saddex dhibcood ugu keenay kooxdiisa kulankiisii koowaad iyo daqiiqadii ugu dambaysay.