Baladweyne (Radio Beerlula)-Mid ka mid ah xiddigaha kooxda kubadda cagta Liverpool ayaa la soo warinayaa inuu ogolaaday heshiis cusub oo uu ku sii joogi doono garoonka Anfield.
James Milner ayaa ogolaaday qandaraas hal sano ah oo uu u saxiixi doono Liverpool, kaasoo ka dhigan inuu garoonka Anfield sii joogi doono muddo siddeed sano ah oo ku eg sanadka 2023-ka.
Isagoo sii joogi doona kooxda Merseyside ilaa dhammaadka 2022/2023, Milner wuxuu sidoo kale gaari doonaa labaatan sano oo kubadda cagta ah heerka sare ee Ingariiska ah, isagoo u saftay Premier League kooxda Leeds, isagoo jiray da’da 16 iyo 309 maalmood.
Wargeyska The Athletic ayaa warinaya in ciyaaryahankii hore ee xulka qaranka England uu iska diiday heshiis kale oo uga yimid kooxo ka mid ah kuwa horyaalka Premier League, isagoo sidoo kale u dhaqaaqi karay horyaalka MLS-ka.
Waxaa la fahamsan yahay in 48-kii saac ee la soo dhaafay lagu soo gabagabeeyay heshiiska, waxaana la filayaa in bayaan rasmi ah oo ku aaddan heshiiskan la soo saaro toddobaadka soo socda