Baladweyne ( Radio Beerlula )-Real Madrid ayaa aqbashay guuldarro ku aaddan baacsigii Trent Alexander-Arnold, taasoo ah guul weyn oo Liverpool u soo hoyatay.
Trent Alexander-Arnold waa mid ka mid ah saddexda xiddig ee waaweyn ee Liverpool ee qandaraaskoodu dhammaanayo xagaaga, laakiin Real Madrid ayaa isku dayaysay inay heshiis la gaarto ka hor inta uusan suuqa Janaayo xirmin.
Real Madrid ayaa hadda ka quusatay inay keensato Trent Alexander-Arnold bishaan Janaayo, sida wararku sheegayaan.
Daafaca midig ee Liverpool iyo xulka England ayaa xor u ah inuu la hadlo kooxo kale si uu heshiis hordhac ah ula gaaro, maadaama uu qandaraaskiisu dhacayo dhammaadka xilli-ciyaareedkan. Madrid ayaa sahamisay suurtogalnimada keeniddiisa bishaan Janaayo, balse uma suurtagelin.
Xiddigan kasoo baxay akadeemiyada Liverpool wuxuu sii waday inuu u ciyaaro kooxdiisa, inkastoo uu keyd ku jiray kulankii Champions League ee ay Liverpool guusha ka gaartay Madrid bishii November. Liverpool ayaa badisay dhammaan toddobadii kulan ee wareega kooxaha, halka Madrid ay u baahan tahay natiijooyin badan oo wanaagsan si ay u xaqiijiso booskeeda siddeedda sare.
Dhaawaca Dani Carvajal ayaa sababay in Los Blancos ay dadaal badan geliso raadinta Alexander-Arnold. Si kastaba ha ahaatee, waxay u muuqataa inay Madrid sugto xagaaga haddii ay dooneyso saxiixiisa.
Sida laga soo xigtay Marca, Real Madrid ma sameyn doonto wax saxiixyo ah inta ka harsan suuqa jiilaalka. Kooxda ayaa sidoo kale xagaagii hore suuqa si hoose ugu jirtay, iyagoo kaliya la saxiixday Kylian Mbappe iyo Endrick.
Wargeyska ayaa intaa ku daraya in Madrid aysan qorsheyneynin wax iibin ah, balse ay diyaar u yihiin inay dhageystaan haddii uu ciyaaryahan codsado inuu baxo. Illaa hadda, ma jiro ciyaaryahan sidaas sameeyay.