Baladweyne(Radio Beerlula)- Magaalada Muqdisho ee caasimadda dalka ayaa waxaa maanta ka furmay shirka wadajir ee hannaanka qaran ee dowladdaha hoose oo ay ka qeyb galayaan wasiirada arimaha gudaha iyo dib u heshiista dowlad goboleedyada iyo maamulka gobolka Banaadir.
Shirkan ayaa waxaa si rasmi ah u furay wasiirka arrimaha gudaha iyo dib u heshisiinta xukuumadda federaalka Soomaaliya Cabdi Maxamed Sabriye.
Arrimaha diirada lagu saarayo shirkan ayaa waxaa ka mid ah sidii dadweynaha loo gaarsiin lahaa adeegyada muhiimka u ah noloshooda, loona daadajin lahaa maamulka.
Cabdi Maxamed Sabriye ayaa tilmaamay in hadafka laga lee yahay shirkan ay tahay horumarinta golayaasha deegaanka, hirgalinta hannaanka dhab u heshiisiinta qaranka iyo sidii xalwaara loogu heli lahaa arrimaha barakacayaasha.
“Shirkan inta uu socdo waxaa lagu gorfeyn doonaa arrimaha ku saabsan horumarinta golayaasha deegaanka, hirgalinta hannaanka dhab u heshiisiinta qaranka iyo sidii xalwaara loogu heli lahaa arrimaha barakacayaasha, sidoo kale waxaa laga doodi doonaan
dajinta qorshaha xasilinta deegaanada la xureeyay”ayuu yiri wasiirka arrimaha gudaha Soomaaliya.
Shirka madasha wadajir ayaa socon doona muddo saddex maalmood ah waxana lagu wadaa in lagu dajiyo qorshaha xasilinta iyo dhismaha golayaasha deegaanka degmooyinka dalka ee lagu howl galayo saddexda bil ee soo socoto.
