Baladweyne(Radio Beerlula)- Ra’iisul Wasaaraha xukuumadda federaalka Soomaaliya Xasan Cali Khayre, ayaa xarunta tababarka ciidanka booliiska ee General Kaahiye ee magaalada Muqdisho tababar ugu soo xiray ciidamo boolis ah oo loogu tallo galay inay door ka qaatan sugidda amniga caasimadda.
Ciidamadan oo tiradooda ay gaareyso 1,400 ciidamo booliis ah ayaa qeyb ka ah 3,000 oo askari oo loogu tala galay fulinta qorshaha sugidda amniga caasimadda dalka.
Ciidamada tababarka loo soo xiray oo laga soo xulay degmooyinka gobolka Banaadir ayaa mudda afar bilood ah la barayay sharciyada booliiska iyo la dhaqanka bulshada.
Degmooyinka uu ka koobanyahay gobalka Banaadir ayaa lagu wadaa in la geeyo si loo dardar geliyo qorshaha sugidda amniga caasimadda Muqdisho.
Ra’iisul wasaare Xasan Cali Kheyre ayaa dhallinyarada booliiska ah ee tababarka loo soo xiray kula dardaarmay in ay si hufan u gutaan waajibaadka ka saaran sugidda amniga.
Sacdiyo Maxamed Maxamuud ayaa warbixintan inoo heysa.
