Baladweyne ( Radio Beerlula )-Tababaraha Barcelona, Hansi Flick, ayaa si caro leh uga hadlay go’aanka La Liga ee dib u dhigidda kulankooda Osasuna labo maalmood uun kaddib dhammaadka fasaxa xulalka.
Barcelona ayaa la filayay inay la ciyaarto Osasuna horraantii bishan, balse ciyaarta ayaa la baajiyay daqiiqado kahor bilaabashadeeda sababo la xiriira geerida dhakhtarka kooxda koowaad ee Barcelona, Carles Minarro, oo geeriyooday saacado kahor kulanka. Kadib, Xiriirka Kubadda Cagta Spain (RFEF) ayaa dib u qorsheeyay kulanka inuu dhaco Maarso 27, labo maalmood uun kaddib marka ciyaartoydu kasoo laabtaan waajibaadka xulalkooda qaranka.
Barcelona ayaa muujisay sida aysan ugu faraxsanayn jadwalka cusub, maadaama ay u badan tahay inaysan heli doonin laba ciyaaryahan oo muhiim ah—Raphinha iyo Ronald Araujo—oo labaduba ciyaaray habeenkii Talaadada. Dhanka kale, Osasuna ayaa iyaguna muujiyay sida aysan ugu qanacsanayn jadwalka cusub, maadaama ay lahaayeen kulan kale 24 saac gudahood, balse kulankooda ay la lahaayeen Athletic Club ayaa hadda dib loo dhigay ilaa Axadda.