Baladweyne ( Radio Beerlula )-Dowladda Ireland ayaa wadda qorshe ay kor ugu qaadayso nolosha dadka ku nool in ka badan labaatan jasiiradood oo fogfog oo ku yaalla badweynta Atlaantigga ee galbeedka dalkaas.
Dadka halkaa u guuraya ayaa lagu xiray shuruudo si ay u helaan deeq lacageed oo dhan 92,000 oo doollar oo si gaar ah loo siinayo iibsadayaasha guryaha iyo dhulka. Lacagaha la siinayo dadka halkaas deegaan ahaanta ugu guuraya waxaa lagu bixin doonaa dhismaha iyo dib u habeynta guryaha horey loo dayacay.
Dadka jasiiradaha hadda ku nool ayaa loo sheegay in aysan jirin wax xaddidaad ah oo ku xiran dhulka iyo guryaha marka ay timaaddo cidda iibsaneysa.
Jasiiradaha waxaa ka mid ah Inis Mór, waana mid ka mid ah jasiiradaha ku yaalla xeebta galbeed ee Ireland, oo ah goobo qurux badan oo sidoo kale ay ku yaallaan goobo loo dalxiis tago kuna teedsan buuro iyo xeebo.
Labaatankii sano ee la soo dhaafay tirada dadka ku nool jaziiradahaan ayaa sii yaraaneysay, laakin qorshaha ay hadda waddo dowladda Ireland ayaa ah in ay halkaa gayso dad badan.
Sida ay tilmaameyso siyaasadda cusub ee dowladda Ireland ka leedahay jasiiradahaan intii u dhaxeysay 1996-kii ilaa 2016, dadka ku nool aaggan ayaa la ogaaday inay hoos u dhacday 12.8%. Warbixinnada qaar ayaa sheegaya in dhalinyaradu ku yaryihiin aaggan.