Baledweyne ( Radio Beerlula )-Wargeyska Faransiiska L’Équipe ayaa shaaciyay in tababaraha reer France Zinedine Zidane uu si dhab ah ugu diyaargaroobayo inuu qabto xilka tababarenimada xulka qaranka France, isagoo beddeli doona Didier Deschamps, oo la filayo inuu xilka ka tago kadib Koobka Adduunka 2026.
Warbixintu waxay sheegtay in Zidane uu hore ula yeeshay wadahadallo Laurent Blanc, oo hore u soo tababarey Les Bleus, si uu uga faa’iideysto waayo-aragnimadiisa. Zidane sidoo kale wuxuu diyaariyay fikrado hordhac ah oo ku saabsan qaabka ciyaareed ee uu doonayo inuu hirgeliyo marka uu xulka la wareego.
L’Équipe ayaa xustay in Zidane uu si dhow ula socdo horyaalka France iyo tartamada Yurub ee kooxaha, gaar ahaan isagoo diiradda saaraya dhalinyarada soo baxaya ee dalka.
Intaa waxaa dheer, Zidane wuxuu ku tiirsan yahay shabakaddiisa ballaaran ee xiriirrada si uu xog uga helo ciyaartoy gaar ah, oo ay ku jiraan shaqsiyaad ka tirsan Xiriirka Kubadda Cagta France (FFF).