Baladweyne ( Radio Beerlula )-Xiddiga reer France ee Kylian Mbpape ayaa kulan fool ka fool ah la yeeshay Antoine Griezmann kaddib markii uu tababare Didier Deschamps go’aan ku gaadhay inuu isaga u doorto kabtanka xulka qaranka Faransiiska, taas oo sida ay wararku sheegayaan uu ka cadhooday Griezmann.
Labada weeraryahan ayaa ku tartamayay kabtanimada xulkooda Faransiiska markii uu ciyaaraha caalamiga ah ka fadhiistay Hugo Lloris, waxaana go’aankiisa ku kala saaray Didier Deschamps.
Tababare Didier Deschamps ayaa kulan casho ahaa oo Isniintii uu la sheegay ciyaartoyda xulkiisa, waxa uu kaga dhawaaqay in Kylian Mbappe uu yahay kabtanka cusub ee xulka qaranka, waxaana sida warbaahinta Faransiisku sheegtay go’aankaas ka cadhooday Antoine Griezmann oo isku arkayay inuu yahay ciyaartoyga ugu habboon ee xaqa u leh maadaama uu toddoba sannadood ka weyn yahay Kylian Mbappe, sidoo kalena uu ka waayo aragsan yahay.
Sida uu qoray wargeyska L’Equipe ee kasoo baxa Faransiiska, Mbappe ayaa si uu u laab-xaadho oo uu u maslaxdo waxa uu markiiba kulan fool ka fool ah la yeeshay Antoine Griezmann, waxaanu u sheegay in isaga iyo Olivier Giroud ay yihiin laba ruug-caddaa ee uu doonayo inay garbihiisa istaagaan.
L’Equipe ma aanu sheegin jawaabta uu siiyey Antoine Griezmann, hase yeeshee waxa la rumaysan yahay in kulankaasi uu meesha ka saarayo xurguftii Mbappe iyo Griezmann.